Alliert

Vi må vere vakne. Faresignala rundt oss har vore tydelege ei god stund.

Autoritære leiarar lovar historisk storheit, og peikar bakover mot ei fortid som aldri kjem att. Men historia burde ha lært oss at det finst ingen farbar veg bakover. Det finst berre eit felles ansvar for å byggje ei betre framtid. Saman.

Difor løftar årets Vestlandskonferanse temaet ALLIERT: Når tryggleiken i etablerte alliansar smuldrar, korleis byggjer vi nye? Når teknologien blir eigd av få, blir handlingsrommet for mange mindre. Korleis kan vi skape motmakt i møte med algoritmar, datastraumar og digitale plattformar?

Demokrati er ikkje ein konstitusjonell tilstand vi anten har eller ikkje har. Demokrati er summen av vår felles innsats, summen av våre valg og prioriteringar. Demokrati er fundamentet for vår produktivitet og verdiskaping. Å halde fast ved dette no som verda rundt oss er i dramatisk endring, vil krevje kunnskap, klokskap og mot. Frå oss alle.

Difor har vi henta inn ei rekke av våre fremste leiarar, teknologar og journalistar nettopp for å finne nye alliansar, basert på kunnskap, klokskap og mot. Når Vestlandet og verda treng det som mest.

– SIREN SUNDLAND
styreleiar i Agenda Vestlandet